ҮҮСЭЛ ХӨГЖИЛ
Сүмогийн Их Аварга Д.Бямбадорж анх 2014 онд Монгол, Япон 2 улсын сургалтын сайн арга, туршлагыг нэгтгэсэн сургууль байгуулах мөрөөдөлтэй болж, улмаар 2015 онд Шинэ Монгол сургуулийн үүсгэн байгуулагч Ж.Галбадрах багшид мөрөөдлээ хэлж, олон удаа уулзаж, зөвлөгөө авсны үндсэн дээр 2016 оны 10-р сард хамтран ажиллахаар тохиролцож, Ерөнхий боловсролын Шинэ Монгол Харүмафүжи сургуулийг байгуулахаар шийдэлд хүрсэн байна.
2017 оны 3-р сард Шинэ Монгол сургууль дээр 1 болон 6-р ангиудад туршилтын анги нээхээр болж, элсэлтийн шалгалт зохион байгуулсан.
Уг шалгалтад нийт 512 хүүхэд бүртгүүлсэн ба анги танхимийн багтаамжаас хамааран 108 эрх, 108 суваргыг бэлгэшээж, 1 ба 6-р ангиуддаа тус бүр 4 бүлэгт 108, 108 сурагч элсүүлэн, 1-р ангийн 2 бүлэг нь 30 сурагчтай, 2 бүлэг нь 24 сурагчтай, 6-р ангийн 2 бүлэг нь 30 сурагчтай, 2 бүлэг нь 24 сурагчтай, 13 багштайгаар хичээллэж эхэлсэн.
2018 оны 08 сарын 21-ний өдөр сургуулийн барилга ашиглалтад хүлээж авах улсын комисс ажиллаж, 2018.08.31-нд комисс хүлээн авч сургуулийн маань барилга ашиглалтад орсон.
Улмаар 2018-2019 оны хичээлийн жилийн нээлтийн үйл ажиллагааг 2018.09.01-нд, сургуулийн шинэ байрны нээлттэй хамт зохион байгуулж, анхны 13 багш дээр нэмж 30 багш, 23 ажилтан авч, 1, 6, 10-р ангийн 4 бүлэгт, 3, 8-р ангийн 2 бүлэгт сурагч элсүүлж, 2018-2019 оны хичээлийн жилд 24 бүлэгт 726 сурагч, 43 багш, 23 ажилтантайгаар анхны хичээлийн жилээ эхлүүлж байсан түүхтэй.
СУРГУУЛИЙН БҮТЭЦ, ЗОХИОН БАЙГУУЛАЛТ
Манай сургууль 2024-2025 оны хичээлийн жилд хичээлийн 3 байранд, 52 бүлэгт, бага, дунд, ахлах сургуулийн нийт 1600 гаруй сурагч, 200 гаруй багш, ажилтантайгаар сургалт хүмүүжлийн үйл ажиллагаа явуулж байна.
БИДНИЙ УРИА
ЭРЭЛХИЙЛ
Сурах арга барил эзэмшиж чадвал амжилттай суралцана. Үүний тулд ЭРЭЛХИЙЛЭГЧ байх ёстой.
ЭРГЭЦҮҮЛ
Сурсан мэдлэг, олж авсан мэдээллээ сайтар ЭРГЭЦҮҮЛЭХ аваас бүтээлц хүн болно.
ДҮҮЛЭН НИС
Бүтээлч хүнд мөрөөдөл, тэмүүллийн жигүүр ургуулбаас амжилтын эзэн болж, улмаар ДҮҮЛЭН НИСДЭГ
"ДЭЛХИЙН БОЛОВСРОЛЫГ ЭЗЭМШИХ МОНГОЛ ИРГЭН
ДЭЛХИЙН ДЭВЖЭЭНД ӨРСӨЛДӨХ МОНГОЛ СУРГУУЛЬ"
"Дэлхийн боловсролыг эзэмших Монгол иргэн" гэдэг нь манай сургуулийн хөтөлбөр олон улсын жишигт нийцсэн байхыг илэрхийлж байгаа. "Дэлхийн дэвжээнд өрсөлдөх Монгол сургууль" гэдэг нь манай төгсөгчид дэлхийн аль ч орны их сургуульд олон орны хүүхэд, залуустай мөр зэрэгцэн амжилттай суралцах чадвартайг илэрхийлсэн.
Бидний эрхэм зорилго
.png)
Эрхэм зорилгын үг болгон нь бидний төгсгөж гаргахыг зорьж буй төгсөгчдөд байх цогц чадамжийг бүрэн тусгасан байхыг зорьсон.
ҮЗЭЛ САНАА
Монгол, Япон олон хүний өгөөмөр тусламж, хичээл зүтгэлийн дүнд байгуулагдсан сургуулийнхаа эхэлсэн цаг, туулсан түүхийг Шинэ Монгол Харүмафүжи сургуулийнхан бид үеийн үед бахархан өчсү.
Дэлхийд үнэлэгдэх монгол иргэн болж төлөвшихийн тулд зүрх сэтгэл, оюун ухаан, бие бялдраа дайчлан өөрийгөө хөгжүүлсү.
Бусдад туслах, талархах сэтгэлээс аз жаргал үүддэгийг санаж, өрөөлд аз жаргал бэлэглэн, өөрийн аз жаргалыг дархалж явсу.
Агуу түүх бүтээсэн эцэг өвгөд, амжилтын эзэд болсон номын ахан дүүсээ дээдэлж, шударга ёс, хүн байгалийн шүтэн барилдлага, хүмүүн төрөлхтөний эв нэгдэл, энхтайвныг эрхэмлэсэн Монгол улсыг цогцлоосу.
