Сургуулийн үүсэл

Хамтарсан компани байгуулсан нь:

“Шинэ монгол Харүмафүжи” Сургуулийн үүсгэн байгуулагчид болох Сүмогийн их аварга Д.Бямбадорж Шинэ Монгол Эрдмийн Хүрээлэнгийн Ерөнхийлөгч Ж.Галбадрах нар хамтран ажиллахаар санал нэгдсэнээр сургуулийн эхлэл тавигдсан байна.

Д.Бямбадорж аварга анх 2014 онд Монгол, Япон 2 улсын сургалтын сайн арга туршлагыг нэгтгэсэн сургууль байгуулах мөрөөдөлтэй болжээ. Улмаар энэ мөрөөдлөө 2015 онд анх Ж.Галбадрах багшид хэлж зөвлөгөө авсан ба тэд 4-5 удаа уулзаж, ярилцсаны эцэст 2016 оны 10 дугаар сард хамтран ажиллахаар тохиролцол, шийдэлд хүрсэн байна.

Д.Бямбадорж аварга нь тус сургуулийн эхний хөрөнгө оруулалтыг, Ж.Галбадрах захирал  Шинэ Монгол сургуулийн Брэнд хөтөлбөрийг нээлттэй хэрэглүүлэхээр тохиролцсон байна.

Тэд 2017 оны 02 дугаар сард 2 гишүүнтэй “Түмэн Амгалан-Өргөө” ХХК-г үүсгэн байгуулж, Улсын бүртгэлд бүртгүүлсэн бөгөөд тус компаний анхны гүйцэтгэх захирлаар Ж.Галбадрахыг томилжээ. Харин 2019 оны 05 дугаар сард хоёр дахь гүйцэтгэх захирлаар Д.Лхагвадоржийг томилсон байна.

Сургууль байгуулах газрыг сонгосон нь:

Тэд компаниа байгуулсаныхаа дараа сургууль байгуулах газрыг эхний ээлжинд  хайж эхэлсэн бөгөөд хөрөнгө зуучийн “Эхлэл”ХХК /Захирал Энхбат/ -иар зуучлуулан “Чоно” группын эзэмшилд байсан 15 га газраас 100 метрийн өргөнтэй, 300 метрийн урттай 3 га газрыг салгаж, өөрийн эзэмшилд авахаар тус группын удирдлагатай хэд хэдэн хэлэлцэл, яриа хийсний үр дүнд тохиролцоонд хүрч чадсан байна.

Тус газрын гэрчилгээг сургуулийн нэр дээр шилжүүлж авах ажлыг гүйцэтгэх захирал Ж.Галбадрах гүйцэтгүүлсэн байна. БОАЖ-ын Сайдын А/59 дугаартай  захирамжаар 0160709 дугаартай газрын гэрчилгээгээ  2017 оны 03 дугаар сарын 22-ны өдөр гардаж авчээ.

Газрын шав тавих ёслол:  2017 оны 6 сарын 9 буюу билгийн тооллоор бурхан багшийн их зүйчсэн өдөр болж,  лам хуврагууд /Эрдэнэбат, Дорж лам тэргүүтэй/ болон үүсгэн байгуулагчдын  гэр бүл, ахан дүүс, Ж.Галбадрах захирал, сургуулийн дэд захирал Н.Өлзийсайхан, Г.Содгэрэл нар оролцсон байна. 

Сургуулийн барилгын зураг зуруулсан нь: 

Д.Бямбадорж аварга барилгын ажил эхлэхээс 1 жилийн өмнө буюу 2016 онд өөрийн ангийн  хүүхэд болох архитектор Б.Гансүх түүний эхнэр Г.Оргодол нарыг японд зочлохыг урьсан байна. Ангийн 2 найзыгаа Диснейланд дагуулан аялж, диснейгийн ертөнцтэй танилцуулж, халуун дулаан орчныг мэдрүүлэн, сургуульд хүүхдүүд маань орохдоо яг та бүхэнд диснейландад төрсөн сэтгэгдэл шиг маш сайхан мэдрэмжийг төрүүлдэг, халуун дулаан уур амьсгалтай сургуулийн зургийг зуруулах хүсэлтээ илэрхийлсэн байна. Ингээд Б.Гансүх, Г.Оргодол нар та бидний сурч байгаа Шинэ Монгол Харүмафүжи сургуулийн анхны ерөнхий зургийг  зурсан бөгөөд бөгөөд сургуулийн план зураг нь дээрээс нь харахад Сүмогийн дүрстэй мөн “Н” үсэг буюу “Harumafuji” гэдэг үгийн эхний үсгийг илэрхийлжээ. Ийнхүү барилгын зургийн гүйцэтгэгчээр “Пуск Дро” ХХКомпаний захирал Б.Гансүх, Г.Оргодол нар ажилласан байна.

Бидний сонгож авсан яармагийн газар дээр салхи баруун хойноос салхилдаг тул сургуулийн төв хаалгыг ноёлох салхины дор зүүн тийш харуулахаар төлөвлөсөн юм. Харин газар маань 100 метрийн өргөнтэй тул зуруулсан зураг өргөөшөө уртадсан учраас В блокийн төлөвлөгдсөн уртаас 6 метрийг хасах шийдвэр гаргаж байжээ.  

Сургуулийн барилгын ажил эхлэхийн өмнө архитектур төлөвлөлтийн даалгавар, барилга эхлүүлэх зөвшөөрөл, техникийн нөхцөл /дулаан, цахилгаан, цэвэр бохир ус, холбоо, дохиолол зэрэг/ зэрэг маш их цаг хугацаа, хөөцөлдлөгөө шаардсан ажлыг гүйцэтгэх захирал  Ж.Галбадрах гардан гүйцэтгэсэн байна.  

Дээрх зөвшөөрөл, гэрчилгээг хөөцөлдөхтэй зэрэгцээ барилгын ажлын гүйцэтгэгч компаниудыг сонгон шалгаруулах нөр их ажил давхар өрнөсөн байна.

Барилгын компаниудыг сонгосон нь:

Сургуулийн барилгын ерөнхий гүйцэтгэгч Ариунболд захиралтай “Голомт констракшн”ХХКомпанийг Ж.Галбадрахын охин Ж.Сайнбуянгийн танилцуулгаар уулзаж, сонгон шалгаруулсан байна. Мөн энэ компаний охин компаниуд болох Батзориг захиралтай “Голомт инженеринг” ХХК/ Дотор сантехник, борооны ус зайлуулах/, Пүрэвдорж захиралтай “Голомт зам” ХХК /Гадна зам талбайн тохижилт, түшиц хана/ -иудыг мөн сонгон шалгаруулсан байна.

Бусад гүйцэтгэгч компаний хувьд өмнө нь Шинэ Монгол-1 сургуулийн барилгын ажлыг гүйцэтгэж байсан, итгэл даах туршлагатай компаниудаас дараах компаниудыг шалгаруулж авсан байна.

Үүнд: 

  • NTC ХХК- Захирал Гантулга /Дотор заслын ажил /

  • Ланд мастер ХХК- Захирал Хосбаяр /Барилгын суурь ухах, газар шорооны ажил/

  • Мегаденки ХХК- Захирал Оюунтулга, Цогоо /Дотор цахилгааны ажил/

  • Ремикон ХК –Захирал Очирбат / Бетон зуурмаг нийлүүлэлт/

  • Дорнын хөгжил ХХК- Захирал Амартүвшин /Дүүргэлтийн блок/

  • Кореа стандарт ХХК - Захирал Жавхлан /Гадна хөөс дулаалга/

  • Мөнхномгон ХХК- Захирал Мөнх-Эрдэнэ /Гадна, дотор ТП цахилгааны ажил/

 

Шинэ Монгол Харүмафүжи сургууль

Хөгжлийн хөтөлбөр

  • 730 хүүхэд
  • 1140 хүүхэд
  • 1410 хүүхэд
  • 1500 хүүхэд
  • 1830 хүүхэд